ᐃᓕᓐᓂᐊᕈᑎ ᐳᕐᑐᓂᓕᓐᓄᑦ: 7 - 12 / ᐱᖁᔨᒍᑕᐅᓯᒪᔪᖅ ᐱᕕᑦᓴᖃᕐᕕᐅᒋᐊᓕᓐᓄᑦ: ᑕᓪᓕᒪᑦ 60 ᑕᕐᓵᐲᑦ ᖃᕆᐊᒥ ᐃᓕᓐᓂᐊᓀᑦ
ᒥᐊᔨ ᓭᒪᓐ ᓴᐳᒻᒥᔨ ᐃᓄᑐᐃᓐᓀᑦ ᐱᒍᓐᓇᐅᑎᖏᓐᓂᒃ ᐱᕐᖁᓯᖏᓐᓂᓗ ᑲᓇᑕᒥ. ᑭᒃᒐᑐᖃᑦᑕᓯᒪᓕᕐᑐᖅ ᐃᓄᑐᐃᓐᓇᓂᒃ ᐱᑦᔪᔨᑦᓱᓂ ᑲᓇᑕᐅᑉ ᑲᕙᒪᖓᓄᑦ ᐊᒻᒪᓗ ᓄᓇᕐᔪᐊᒥᐅᖑᖃᑎᒌᑦ ᐊᑕᐅᓯᐅᓕᖓᕕᖓᓂ, ᐃᓚᖃᕐᒥᓱᓂ ᐱᓇᓱᑦᑕᐅᓯᒪᔪᒥᒃ ᓯᕗᓕᕈᑕᐅᓯᔪᕕᓂᕐᒥᒃ ᐃᓄᑐᐃᓐᓇᓂᒃ ᐃᓚᐅᓯᓚᕿᑎᑦᓯᓱᓂ ᐱᖁᔭᕐᔪᐊᒥ 1982ᖑᑎᓪᓗᒍ.
ᐃᓅᓕᕐᓯᒪᔪᖅ ᑲᖏᕐᓱᐊᓗᒃᔪᐊᖅ ᓄᓇᕕᒃ, (ᑯᐯᒃᒥ), ᓭᒪᓐ ᐃᓚᖏᑦ ᐊᐅᓪᓛᑐᕕᓃᒃ ᑰᒃᔪᐊᒧᑦ, ᑖᕙᓂᓗ ᐃᓕᓐᓂᐊᑐᕕᓂᐅᓕᕐᓱᓂ ᑲᓇᑕᐅᑉ ᑲᕙᒪᖓᑕ ᐃᓕᓐᓂᐊᕕᖁᑎᖓᓂ. ᓭᒪᓐ ᐊᑕᑕᖓ ᒥᕐᖁᓕᓐᓂᐊᑎᐅᓯᒪᔪᖅ ᓂᐅᕕᕐᑎᑯᓐᓄᑦ (Hudson Bay Company) ᐊᓈᓴᖓ ᐃᓄᑐᐃᓐᓇᐅᓯᒪᔪᖅ. ᓭᒪᓐ ᐳᕐᑐᓂᕐᒥᓂᒃ 6ᒥ ᐱᔭᕇᕋᒥ, ᐊᖏᕐᕋᒥᓂᖔᖅ ᐃᓕᓐᓂᐊᑎᑕᐅᓕᕐᑐᕕᓂᖅ ᐊᑖᑕᒥᓄᑦ.
1970 ᐊᕐᕌᒍᖏᑦ ᐊᑐᕐᑎᓗᒋᑦ, ᓭᒪᓐ ᐱᓇᓱᑦᓯᒪᔪᖅ CBCᑉ ᑕᕐᕋᒥᒃ ᐱᑦᔪᔨᕕᖓᓂ. ᕿᓂᕐᓱᓂ ᐱᕕᑦᓴᒥᒃ ᓄᐃᑦᓯᒍᒪᑦᓱᓂ ᓇᒻᒥᓂᖅ ᐊᒻᒪᓗ ᐱᓂᐊᕐᓂᓕᕆᓂᕐᑎᒍᑦ ᑕᐅᑐᑦᑕᒥᓂᒃ ᐊᕝᕕᐊᑕᐅᒍᓐᓀᓗᓂ, ᐱᓇᓱᒋᐊᕐᑐᓕᕐᓂᒥᔪᖅ ᐃᓄᐃᑦ ᑲᓱᑦᔨᖃᑎᒌᓐᓂᖓ ᑯᐯᒃ ᑕᕐᕋᖓᓂ (NQIA) ᐱᓇᓱᕝᕕᖓᓄᑦ ᑖᓐᓇ ᑐᓂᒪᔪᖅ ᓴᐳᒻᒥᓂᐊᕐᓗᓂ ᐃᓄᑐᐃᓐᓀᑦ ᐱᒍᓐᓇᐅᑎᖏᓐᓂᒃ ᐱᒍᒪᒐᔭᕐᑕᖏᓐᓂᓗ ᓄᓇᕕᒻᒥ. ᑭᖑᓂᖓᒍᑦ ᐊᑎᓕᐅᕈᑕᐅᓚᐅᕐᑎᓗᒍ 1975ᒥᓄᓇᑖᕈᑎ ᐊᖏᖃᑎᒌᓐᓂᑯᑦ,NQIA ᐊᓯᐊᓂᑦ ᑌᒎᓯᕐᑖᓕᓚᐅᕐᓯᒪᔪᖅ ᒪᑭᕝᕕᐅᓯᑦᓱᓂ. ᑭᖑᓂᖓᒍᓪᓗ ᒥᐊᔨ ᐊᖓᔪᕐᕌᕈᕐᓯᒪᑦᓱᓂ ᑕᒃᒐᓂ, ᓭᒪᓐ ᐃᓚᐅᓯᒪᔪᖅ ᐊᑐᓕᕐᑎᑕᐅᒐᓱᐊᕐᑎᓗᒍ ᔦᒥᓯ ᐯ ᑯᐯᒃ ᑕᕐᕋᖓᑕᓗ ᐊᖏᖃᑎᒌᒍᑕᐅᓯᒪᒍᑎᖓ.
ᓭᒪᓐ ᐱᓇᓱᖃᑕᐅᖃᑦᑕᓯᒪᓕᕐᑐᖅ ᐅᑭᐅᕐᑕᑑᑉ ᑲᑎᒪᔨᖏᓐᓄᑦ ᐊᒻᒪᓗ ᑕᕐᕋᒥᐅᑦ ᑲᑎᒪᔨᖏᓐᓄᑦ. ᑭᒃᒐᑐᕐᑎᐅᓯᒪᒻᒥᔪᖅ ᑲᓇᑕᒥᐅᓂᒃ ᑭᒃᒐᑐᕈᑎᖃᕐᓱᓂ ᐅᑭᐅᕐᑕᑐᑉ ᐱᓂᐊᕐᓂᓕᕆᔭᐅᒍᑎᖏᓐᓂᒃ ᐊᒻᒪᓗ ᑲᓇᑕᒥᐅᓂᒃ ᑭᒃᒐᑐᕐᓱᓂ ᑎᓐ ᒪᐅᒃᒧᑦ (Denmark).
ᐱᒋᐊᖕᖓᓂᖓᓂ 2006, ᓭᒪᓐ ᐱᔨᑦᓯᓯᒪᔪᖅ ᒪᕐᕈᕕᑦᓱᓂ ᓂᕈᐊᕐᓈᓂ ᐊᖓᔪᕐᖄᖑᖃᑦᑕᓱᓂ ᐃᓄᐃᑦ ᑕᐱᕇᑦ ᑲᓇᑕᒥ (ITK), ᑖᓐᓇ ᑭᓯᐊᒐᖃᕐᕕᐅᔪᖅ ᓯᕗᒧᑦᑎᓯᒐᓱᐊᕐᓂᒥᒃ ᐃᓄᑐᐃᓐᓀᑦ ᐱᒍᓐᓇᐅᑎᖏᓐᓂᒃ, ᑕᒃᒐᓂ ᖃᐅᔨᔭᐅᑎᑦᓯᓚᕆᒐᓱᐊᕐᓱᓂ ᐃᑉᐱᒋᔭᐅᓕᐅᒥᖁᑦᓱᒋᑦ ᖃᓄᐃᖕᖏᓯᐊᕆᐊᖃᕐᓂᖅ ᐃᓕᓐᓂᐊᓯᒪᒋᐊᖃᕐᓂᒧᓪᓗ ᐱᑦᔪᑕᐅᔪᑦ ᐊᑯᓐᓂᖏᓐᓂ ᐅᕕᒃᑫᑦ ᑕᕐᕋᒥ. ᓭᒪᓐ ᐃᓂᖃᑫᓐᓇᓯᒪᒻᒥᔪᖅ ᑐᑭᒧᐊᑦᑎᓯᔨᐅᑦᓱᓂ ᐃᓕᖓᔪᒥᒃ ᐱᐊᕋᕐᓄᑦ ᐅᕕᒃᑲᓄᓪᓗ ᑕᕐᕋᒥ ᑐᖕᖓᕕᑦᑖᑕᐅᒪᐅᑎᖏᓐᓄᑦ ᐊᒻᒪᓗ ᑎᑭᑦᓱᒍ 2014 ᑐᑭᒧᐊᑦᑎᓯᔨᐅᓯᒪᒻᒥᓱᓂ ᑲᓇᑕᒥ ᑲᑎᒪᔩᑦ ᑲᑎᒪᔨᐅᒍᑎᒋᑦᓱᒍ ᐃᓄᑐᐃᓐᓀᑦ ᐃᓕᓐᓂᐊᓯᒪᒋᐊᖃᕐᓂᖓ.
ᐊᓯᖏᑦ ᐊᒥᓱᑦ ᐃᑉᐱᓇᕋᓗᐊᕐᒥᑎᓪᓗᒋᑦ, ᓭᒪᓐ ᒥᐊᓂᕐᓯᔨᐅᖃᑕᐅᔪᖅ ᑲᓇᑕᐅᑉ ᐃᓕᓪᓚᓯᒪᐅᑎᖏᓐᓂᒃ, ᑲᓇᑕᐅᑉ ᑭᒃᒐᑐᕐᑎᖓᑕ ᑕᕐᕋᒧᑦ ᐃᓕᑕᕐᓯᒍᑎᖓ, ᐃᓕᑕᕆᔭᐅᒍᑎᓕᒃ ᑲᓇᑕᐅᑉ ᐃᓂᓪᓚᓯᒪᐅᑎᖏᓐᓄᑦ ᑯᐯᒃᒥ,ᐃᓕᑕᕆᔭᐅᒍᑎ ᐃᓂᓪᓚᓯᒪᑦᓯᐊᓂᕐᒧᑦ ᐊᑯᑭᑦᑐᒥᑦ,ᑲᓇᑕᒥ ᓄᓇᖃᕐᖄᓯᒪᔪᑦ ᐱᔭᖃᕐᓯᒪᓂᕐᒥᓄᑦ ᐃᓕᑕᕆᔭᐅᒍᑎᖓ, Gold Order ᐱᓯᒪᔪᖅ ᑲᓇᑕᒥᐅᑦ ᓄᓇᒥᑎᒍᑦ ᐃᓅᖃᑎᒌᖏᓐᓂᑦ,the Symons Medal,ᑲᓇᑕᐅᑉ ᑭᒃᒐᑐᕐᑎᖓᑕ ᑕᕐᕋᒧᑦ ᐃᓕᑕᕐᓯᒍᑎᖓ. ᐃᓚᐅᔪᖅ ᓄᓇᕐᔪᐊᒥ ᐊᕐᓀᑦ ᐱᓯᑏᑦ ᑕᑯᑦᓴᐅᑎᑕᐅᕕᖓᓂ.ᐃᓚᐅᔪᖅ ᑕᕐᕋᒨᓕᖓᔪᓂᒃ ᐱᓇᓱᕝᕕᒥ ᑲᓇᑕᒥ ᐊᒻᒪᓗ ᑲᓇᑕᒥᐅᑦ ᓄᓇᒥᑎᒍᑦ ᐃᓅᖃᑎᒌᕝᕕᖓᓄᑦ.
