Wilton Littlechild awa Nehiyaw Okimākahn, ka kih sapotiht kiskinwahamātowin, opēkiskwestamakew e-wawecihiwēt misiwē iskamik ekwa ota oma askiy, kita wa wihcetāt ohi Askiyweyiniwak ka isi pamihicik ekwa mēna asotamākewina ka pimitsahamihk. Ekosi mēna wēya –e-nekānet ota ka nitonamihk oma tāpwewin Truth and Reconciliation ka itamihk- kih opinam oma nistaweyitamiwin ewako oma kayātih ka kih isiwepiniket awa Okimāw Kānata ka kih nisowanacihtat oma nehiyawi pimātsiwin ota Kānata.

Oma tipahaskān Alberta ka kih pih opikiht, ekota e-kih pēci kanaweyimiht kiskinahamātowinihk neyo sāp pipon ka sāposkahk e-mametawet ekwa e-kiskinahamāsot. Ispih ka poyot ekosi kih kiskinahamāsew metawewi kiskinahamāwasowin, ekwa mēna Pēkiskwestamākewin kespāk kiskinahamātowin Alberta ekosi neso kekwāya e-tipitotahk.

Wilton Littlechild awa kih akisew ekota anikih kā kih itsahocik ka nepawēstamawātcik Askeweyiniwa (UN) ita kākeyaw okimāwina misiweskamik ka māmawapihk ekota kih atoskātam oma masinahikan Askewihyiniwak kicih tānsi tesi pamihecik. Kih ma māmawihpehiwew ekota (UN) ka kwe yakihtāht ohi Askeweyiniwa ka wecihiweyit kespayik soniyāw ohci ahpo pimātsiwin UN oki ka atoskātakik. 1980 māka kih petokatāw oyasowewinihk ka kipiskawāt ohi Okimāwa Ottawa eka kihci oyasowewin ka petokatāyit e mwayēs kih kita patamiyit ekwa ka kispewātamiyit Askeweyiniwi Asotamākewina, mēna anohceke mawac kih nekān apiw om aka kanawāpamihcik Neyiyawak, Apihtawikosānak, ekwa Ayaskemewiyiniwak misihowin kicih.

Tāhkoc mēna oma ka isi atoskawāt anihi Tāpwewin ekwa Ponihyitamowin kāpeyit, keyāpic wēya tipiyaw pimpayihtaw Opēkiskwestamākewin ota Isonikanihk Ermineskin ekwa e-mā metawet.

1993 ke meyik ohi Kānata Okimāwin ohi Canada 125 Medal pewāpisk ka tāpiskahk. Ekosi mēna anima 2015 Indspire award mekiwin ka itcikātek. Ahcic mēna Alberta Award of Excellence kih kaskihtamāsew.