“ᐃᕝᕕᐅᕗᑎᑦ ᑕᒐ ᑭᓇᐅᑦᓴᐅᑎᒋᑦᓱᑎᑦ ᐃᓅᓕᕐᓯᒪᔪᑎᑦ. ᐃᓅᓕᕐᓯᒪᔪᖓ ᐃᓄᑐᐃᓐᓇᐅᓱᖓ ᑭᓇᐅᓂᕋᒍᑦ ᐊᑦᔨᐅᖏᑦᑐᒥᒃ ᐱᕐᖁᓯᖃᕐᓱᖓ ᐅᖃᐅᓯᖃᕐᓱᖓᓗ ᐊᒻᒪᓗ ᐊᕙᑎᒐ ᐊᑦᔨᐅᒐᓂ ᐃᓅᒍᓯᒐᓗ. ᑕᒪᓐᓇ ᑎᒍᐃᓐᓇᑕᐅᑉᐸᑦ ᐊᖓᔪᕐᖃᐅᓯᕐᓂᖅ ᐊᑐᕐᑕᐅᑎᓪᓗᒍ ᐅᕝᕙᓗᓘᓐᓃᑦ ᐱᖕᖒᔭᕐᓱᒍ ᐱᑦᓯᐊᖏᓐᓂᑯᒃ ᐱᕙᓪᓕᐊᑎᑦᓱᒍ, ᐊᒥᓱᐃᓂ ᖃᓄᐃᓕᖓᐅᓯᐅᔪᓂ, ᐅᕙᓐᓄᓕ, ᑕᒪᓐᓇ ᓱᒃᑯᔨᐊᖃᕐᓂᖅ ᑕᑯᑦᓱᒍ ᐱᒍᓐᓇᐅᑏᑦ ᐃᓅᖃᑕᐅᓂᕐᓄᑦ.”

ᒥᐊᔨ ᓭᒪᓐ ᓯᑕᒪᐅᔪᕐᑐᓂᒃ ᐅᑭᐅᖃᓕᕐᓱᓂ, ᐃᒧᒪᑲᓪᓚᐸᓚᐅᕐᑐᖅ ᐊᑎᒋᒥ ᐃᓗᐊᓂ ᕿᐅᔭᓇᕐᑐᐋᓗᒻᒥ -40° C ᓂᒃ ᕿᐅᔭᓇᕐᓂᓕᒻᒥ, ᑲᑎᓯᕙᑦᓱᓂ ᐱᖃᑎᒥᓂᒃ, ᐱᓱᓯᑦᓱᑎᓪᓗ ᑕᐅᓄᖓ ᐃᓕᓐᓂᐊᕕᒻᒥᓄᑦ ᐅᖓᓯᑦᑐᑲᓪᓚᒧᑦ.

ᑭᓯᐊᓂᓕ ᐱᕈᕐᐸᓕᐊᓕᕐᓱᑎᒃ, ᓱᒍᒪᓂᕐᑖᐸᑦᓱᓂ. ᓂᐱᕆᑦᑑᓱᓂ ᖁᕕᐊᓱᐊᔪᖅ ᓂᐱ ᐃᒥᐊᔪᖅ ᑕᒪᐅᖓᑐᐃᓐᓇᖅ ᓂᐸᓕᔭᖕᖏᑐᒥ.

“ᐃᓄᑦᑎᑐᑦ ᐅᖄᖃᑦᑕᕆᐊᖃᕈᓐᓀᕋᑦᑕ,”ᓇᐅᑭᐊᖅ ᐃᓯᑦᔪᕆᕙᑦᑐᖅ.

ᑲᑉᐱᐊᑌᑦᑐᖅ ᐅᖄᖏᓐᓇᓚᐅᕐᑐᓲᖑᒐᓗᐊᕐᑎᓗᒍ, ᑭᓯᐊᓂ ᓂᐸᖏᑦᓴᐅᑎᒋᕙᑦᓱᓂ.

“ᐃᓕᓐᓂᐊᕕᒻᒧᑦ ᑎᑭᐅᑎᑦᒐᑦᑕ, ᐅᖄᖃᑎᒌᖃᑦᑕᓯᒪᖕᖏᑐᒍᑦ,’’ ᒥᐊᔨ ᐅᖃᕐᑐᖅ.’’ᑌᒣᑦᑐᒦᒃ ᑕᐅᑐᕐᖂᕈᓐᓇᕿᑦ?”

ᐃᓕᓐᓂᐊᕕᒻᒥ ᑕᕐᕋᒥ, ᐊᐅᓚᑕᐅᔪᒥ ᑲᓇᑕᐅᑉ ᑲᕙᒪᖓᓄᑦ, ᐃᓄᑐᐃᓐᓀᑦ ᕿᑐᕐᖓᖏᑦ ᐅᖄᒍᓐᓇᖃᑦᑕᓯᒪᔪᑦ ᖃᓪᓗᓈᑎᑐᑦ ᑭᓯᐊᓂ ᐃᓕᓐᓂᐊᕕᐅᑉ ᓯᕙᓂᖓ ᓯᕙᓂᖕᖏᓂᓕᒫᖓᓂ ᐊᒻᒪᓗ ᐊᖏᕐᕋᕈᓐᓇᓯᑦᓱᑎᒃ. ᑖᒃᑯᐊᓗ ᓈᓚᖕᖏᑐᐊᕋᒥᒃ ᓱᒋᐊᕐᑕᐅᐸᑦᓱᑎᒃ.

ᑕᒪᓐᓇ ᓄᓇᕕᒻᒦᓚᐅᕐᓯᒪᔪᖅ, ᑯᐯᒃᒦᑦᑐᒥ ᐊᕐᕌᒍᖏᑦ 1950 ᐊᑐᕐᑎᓗᒋᑦ. ᐊᒥᓱᒻᒪᕆᐊᓗᐃᑦ ᐊᓯᑦᔨᓯᒪᓕᕐᑐᑦ ᑲᓇᑕᒥᐅᓄᑦ ᐃᓄᑐᐃᓐᓇᓄᑦ ᑌᒪᖕᖓᓂᐅᓚᐅᕐᓯᒪᒻᒪᑦ. ᑭᖑᓪᓕᐸᐅᖃᑕᐅᑦᓱᓂ ᐊᖏᕐᕋᓕᐊᖑᓯᒪᑦᓱᑎᓪᓘᑐᓄᑦ ᐃᓕᓐᓂᐊᕕᓐᓄᑦ, ᒥᐊᔨᐅᑉ ᐅᐸᒐᔭᑦᓯᒪᔭᖏᑦᑕ ᐃᓚᖓ ᐃᓕᓐᓂᐊᑐᕕᓂᐅᒍᓂ ᓄᓇᕕᒻᒥ ᐃᓕᓐᓂᐊᕈᓯᖅ ᐊᑐᕐᓗᒍ ᐊᖏᕐᕋᒥᖔᖅ ᐃᓕᓐᓂᐊᓂᖕᖏᑯᓂ, ᐅᒃᑯᐊᓯᒪᔪᖅ 1996ᒥ. 2008 ᖑᓕᕐᑎᓗᒍ ᑲᓇᑕᐅᑉ ᑲᕙᒪᖓ ᓄᐃᑦᓯᓚᕆᑦᓯᒪᔪᖅ

ᐅᒃᒍᐊᕈᑎᒥᓂᒃ ᐃᓕᖓᔪᒥᒃ ᓱᒃᑯᔨᐊᖑᓯᒪᔪᓄᑦ ᓄᓇᖃᕐᖄᓯᒪᔫᑦᓱᑎᒃ ᓄᐃᑦᓯᓚᐅᔪᔪᖅ, ᒦᑏᓄᑦ (ᐋᓪᓚᖓᔪᓄᑦ) ᐃᓄᑐᐃᓐᓇᓄᓪᓗ ᐊᑑᑎᓯᒪᔪᓄᑦ ᐃᓕᓐᓂᐊᕕᑦᑎᒍᑦ ᐱᐅᓯᐅᔪᓂᒃ.

ᒥᐊᔨ ᐱᒋᐊᓪᓚᕈᒪᔪᖅ’’ ᓴᕐᕿᑎᑦᓯᓗᓂ ᓯᕗᒧᑦ ᐃᓱᒪᒍᓐᓇᑐᒥᒃ,’’ ᐃᑉᐱᒍᓱᒐᒥ ᐱᒍᓐᓇᓯᒍᑕᐅᒍᓐᓇᑐᒥᒃ ᐱᕙᓪᓕᑎᑦᓯᓂᕐᒧᑦ ᐃᓱᒪᕐᓱᕈᓐᓇᐅᑎᖏᓐᓂᒃ ᐃᓄᑐᐃᓐᓀᑦ ᒪᓐᓇᐅᒪᑦ ᑐᑭᓯᓗᒍ ᐊᐅᓚᑦᔭᕆᐊᕈᑎᒋᓗᒍᓗ.

“ᐊᑖᑕᒐ ᐅᖃᓕᐅᒥᔮᖏᓐᓇᐸᓚᐅᕐᒪᑦ, ᐊᓈᓇᒐᓗ ᐊᓈᓇᑦᓯᐊᕋᓗᑦᑕᐅᖅ, ‘’ ᐅᖃᕐᓱᓂ,’’ ᐃᒣᓕᑦᓱᓂ ᑕᑯᒍᕕᑦ ᐱᐅᒋᖕᖏᑕᕐᓂᒃ ᐊᓯᑦᔨᖁᓗᒍᓗ, ᐊᓯᓐᓂᒃ ᐅᑕᕐᕿᑐᐃᓐᓇᐸᓐᓂᐊᖏᑦᑐᑎᑦ ᐊᓯᑦᔩᔪᑦᓴᒥᒃ. ᑲᒪᖃᑕᐅᓗᑎᑦ ᓴᖑᓂᐊᕐᒪᑦ ᐱᐅᒋᔭᕐᓄᑦ.’’

15ᓂᒃ ᐅᑭᐅᖃᓕᕐᓱᓂ, ᒥᐊᔨ ᐃᑉᐱᒍᓱᑉᐸᓕᐊᓯᔪᕕᓂᖅ ᐊᕙᑎᒥᓂᒃ ᐃᓅᕕᒋᔭᒥᓂᒃ, ᑕᑯᓕᕐᓱᓂ ᐱᑐᑦᓯᒪᖕᖏᓗᑐᕆᐊᖓ ᑖᒃᑯᓄᖓ ᐱᕕᑦᓴᓯᐊᖁᑎᐋᓗᖏᓐᓄᑦ ᐱᒍᓐᓇᐅᑎᖏᓐᓄᓗ ᓄᓇᖃᕐᖄᓯᒪᔫᒐᑎᒃ ᑲᓇᑕᒥᐅᑦ ᐃᓱᕐᕆᒋᑦᓯᐊᑖᓗᒋᑦᓱᒋᑦ.

ᐅᓂᒃᑳᓯᐅᕐᑎᕈᕋᒥ ᑐᓴᕋᑦᓴᐅᓂᐊᕐᑐᓂᒃ, ᓂᐯᑦᑑᑐᐃᓐᓇᓂᕆᓲᖓ ᐊᑑᑎᕐᖃᔦᕐᓯᒪᓪᓚᕆᑦᑕᖓ.

“(CBC) ᐅᖃᓚᐅᕐᓯᒪᔪᖅ ᐱᓂᐊᕐᓂᓕᕆᔨᖕᖑᐸᓪᓕᐊᑐᐃᓐᓇᓕᕆᐊᕋᓂᒃ ᑐᓴᕋᑦᓴᓂᐊᓕᕋᒪ. ᑌᒣᒻᒪᑦ ᐊᖓᔪᕐᖄᕋ, ᐊᑕᐅᓯᕐᒥᓘᓐᓃᑦ ᐅᖃᐅᓯᕐᒥᒃ ᐃᓄᒃᑎᑐᑦ ᐅᖃᕐᖃᔭᕋᓂ, ᐅᖃᓚᐅᕐᓯᒪᔪᖅ ᐃᒣᓕᓗᖓᓘᓐᓃᒎᖅ ᐱᑦᓯᐊᓂᕐᓴᐅᖃᑦᑕᓯᓗᖓ ᑐᓴᕋᑦᓴᓂᐊᓕᕈᒪ, ᐅᕝᕙᓗᓘᓐᓃᑦ ᐃᒻᒪᖄ ᐱᐅᔫᒐᔭᕆᐊᖓ ᐱᒋᐊᓕᕈᒪ ᐱᓂᐊᕐᓂᓕᕿᓂᕐᒥᒃ. ᑕᕐᖀᑦ ᐊᓂᒍᕐᑎᓗᒋᑦ ᑖᕙᓃᒍᓐᓀᓕᓚᐅᕐᓯᒪᔪᖓ.’’

ᐊᐅᓪᓛᓕᓚᐅᕐᓯᒪᔪᖅ ᐋᑐᕗᐊᒧᑦ ᐱᒋᐊᕐᕕᒋᓯᑦᓱᒍᓗ ᓯᕗᓪᓕᐸᒥ ᐊᒻᒪᓗ ᐊᖏᕐᕋᕆᓯᑦᓱᒍ ᐱᓂᐊᕐᓂᓕᕆᓪᓚᕆᕝᕕᒋᓯᑦᓱᒍ, ᐃᓄᐃᑦ ᑕᐱᕇᑦ ᑲᓇᑕᒥ (ITK) – ᑌᑦᓱᒪᓂᐅᑎᓪᓗᒍ ᐃᓄᐃᑦ ᑕᐱᕇᑦᓴᖅ ᑲᓇᑕᒥ (ITC) – ᑲᓇᑕᐅᑉ ᐃᓄᑐᐃᓐᓇᖏᑦᑕ ᑲᓇᑕᓕᒫᒥ ᐱᒐᓱᐊᕐᕕᒋᒻᒪᕆᑦᓱᒍ ᑲᑎᑦᑕᕕᖓ. ᐊᖓᔪᕐᖄᖑᓯᒪᒐᓗᐊᕐᒥᓱᓂ ᐃᓄᑐᐃᓐᓀᑦ ᐅᑭᐅᕐᑕᑐᒥᐅᑦ ᑲᑎᒪᔨᖏᓐᓂ (ICC) – ᑕᒪᓐᓇ ᐅᖃᕐᑕᐅᒍᓯᖃᓪᓚᕆᑦᓯᒪᔪᖅ ‘’ᐃᔅᑭᒨ’’ (“Eskimo”) ᐃᓇᖏᕐᑕᐅᓱᓂ ᐆᒧᖓ ‘’ᐃᓄᐃᑦ’’- ᐃᓚᐅᒻᒥᔪᖅ ᑲᑐᑦᔨᔪᑦ ᓄᓇᕐᔪᐊᒥᐅᖑᖃᑎᒌᑦ ᐊᒻᒪᓗ ᑲᓇᑕᐅᑉ ᑲᕙᒪᖓᓂᒃ ᑭᒃᒐᑐᕐᑎᐅᓱᓂ ᑲᓇᑕᐅᖕᖏᑐᒦᑦᓱᓂ ᐃᓕᖓᔪᒥᒃ ᐅᑭᐅᕐᑕᑐᒥ ᐱᓇᓱᐊᕐᑕᐅᔪᓄᑦ ᐊᒻᒪᓗ ᐊᑕᓂᐅᕕᑦᔪᐊᖓᓄᑦ ᑎᓐᒫᒃ (Denmark), ᐅᑎᑦᓭᓇᑐᐃᓐᓇᖃᑦᑕᓯᒪᔪᖅ ᐃᓄᐃᑦ ᑕᐱᕇᑦ ᑲᓇᑕᒥ ᐱᑦᔪᔨᕕᖓᓄᑦ.

ᐊᕐᖁᑎᒋᑦᓱᒍ ᐃᓄᐃᑦ ᑕᐱᕇᑦ ᑲᓇᑕᒥ ᐱᑦᔪᔨᕕᖓ, ᒥᐊᔨ ᐊᑐᐃᓐᓇᐅᓯᐊᓕᕐᑐᖅ ᐊᔪᐃᓐᓇᕈᑦᔨᒋᐊᒥᒃ ᐃᓄᖁᑎᒥᓂᒃ. ᓵᓚᐅᒋᐊᑐᐃᓐᓇᓲᖑᖕᖏᑐᖅ, ᐃᒣᒋᐊᖃᕐᓂᐊᕋᓗᐊᕈᓂ ᓂᑯᕕᕝᕕᖃᕐᓗᓂ ᑲᓇᑕᐅᑉ ᐊᖓᔪᕐᖄᖓᓂ ᐳᕃᔭᓐ ᒪᓪᕉᓂᒥᒃ ᑌᒣᒋᐊᖃᓚᐅᕐᓯᒪᒐᒥ ᑐᕐᖃᑕᕐᕕᐅᒍᑎᓖᑦ ᐊᑦᔨᒌᖕᖏᑐᓂᒃ ᑲᑎᒪᓂᒻᒪᕆᖓᓂ 1985ᒥ.

ᐃᑦᓯᕙᐅᑕᖃᕐᑎᑕᐅᓚᐅᕐᓯᒪᖕᖏᑐᕐᓘᓃᑦ ᓵᒥᖃᑕᐅᕕᑦᓴᒥᓂᒃ ᑲᑎᒪᖃᑕᐅᓗᓂ, ᑭᓯᐊᓂ ᐊᑦᑐᐃᑲᓪᓛᓕᓚᐅᕐᓯᒪᔪᖅ ᐱᖃᑎᒥᓂᒃ ᑐᐃᖏᑎᒍᑦ ᐊᒻᒪᓗ ᐃᖏᒍᓐᓇᓯᓚᕿᑦᓱᓂ ᐃᑦᓯᕙᐅᑕᖓᓄᑦ. ᐊᖏᖃᑕᐅᑐᐃᓐᓇᓚᐅᕐᓯᒪᖕᖏᑐᖅ ᐱᑦᓯᐊᖏᑦᑐᑕᓕᓐᓄᑦ, ᐊᒻᒪᓗ ᓴᐳᒻᒥᓚᐅᕐᓯᒪᑦᓱᓂ ᑖᒃᑯᓂᖓ ᑐᑭᓯᒪᓂᖃᓪᓗᐊᖏᑦᑐᓂᒃ ᐊᔭᐅᕆᓂᕐᒥᒃ.

“ᑕᒪᓐᓇ ᑐᓵᒍᓐᓇᓚᐅᕐᓯᒪᔦᑦ ᐸᑎᒐᕈᑕᐅᒻᒪᕆᓐᓂᖓ ᑕᒃᒐᓂ ᐃᒃᓗᔪᐊᕌᓗᒻᒥ ᐃᒥᐊᒐᓚᒻᒪᕆᓕᕐᓱᓂ. ᑕᒪᓐᓇ ᐊᔪᒉᓐᓂᐸᐅᑎᓪᓗᒍ ᐊᑐᑎᓯᒪᔭᕋ ᐃᓅᓯᕋᓂ. ᑭᓯᐊᓂ ᐱᔭᕆᔭᐅᓂᕋᕐᑕᐅᓚᐅᕐᓯᒪᔪᖅ ᐊᑑᑎᓚᐅᕐᓯᒪᖕᖏᓯᐊᕐᑐᖅ, ‘’ ᐅᖃᕐᑐᖅ ᒥᐊᔨ.

ᐊᕐᕌᒍᐃᑦ ᐊᕙᑎᓪᓗ ᖁᓕᓪᓗ ᐊᓂᒍᕐᑐᑦ ᓱᓕ ᐃᓕᑕᕆᔭᐅᖃᑦᑕᖏᓐᓇᑎᓪᓗᒍ ᒥᐊᔨ ᐃᓄᓐᓄᑦ.

“ᐃᓄᐃᑦ ᐊᐅᓚᔨᑦᓯᐊᑐᐃᓐᓇᓲᑦ ᐃᕝᕕᐅᕕᑦ ᑕᒐ ᓚᑦᓱᑎᒃ. ‘ᐊᔪᒉᑦᑐᐋᓗᒃ ᐅᕙᓐᓄᑦ ᐃᓄᐃᑦ ᓂᓪᓕᒪᑕ ᑌᒫᒃ ᐅᕙᓐᓄᑦ. ᑌᒪᖕᖓᓯᐊᖅ ᒥᑭᓪᓕᑎᓲᖑᔪᖓ ᑕᒪᑦᓱᒧᖓ, ᐱᑦᔪᑎᒋᑦᓱᒍ ᐃᓱᒪᑐᐃᓐᓇᓲᖑᒐᒪ, ‘ ᐱᓇᓱᒋᐊᓕᒐᓂᒃ ᐱᓇᓱᑐᐃᓐᓇᕆᐊᒥᒃ.’’

ᒥᐊᔨ ᐊᕐᓇᑑᒍᓪᓕᐅᓲᖅ ᖃᕆᐊᒥ ᐊᖑᑎᑕᓕᒻᒥ ᐱᒍᓐᓇᓂᓕᐋᓗᓐᓂᒃ. ᐱᐅᓯᕐᒥᓂᒃ ᓃᑦᔮᒍᓐᓇᓯᐊᕐᓂᒥᓂᒃ ᑲᔪᓯᒍᑎᖃᑦᓯᐊᑐᐃᓐᓇᓲᖅ, ᐱᖑᒪᓂᕐᑖᑎᑕᐅᓯᒪᑦᓱᓂ ᑮᑕᐅᖕᖏᑐᖅ ᑖᒃᑯᓄᖓ ᐱᒍᓐᓇᐅᑎᓄᑦ ᐱᒐᓱᐊᕐᑕᒥᓄᑦ ᑎᒍᒍᓐᓇᓯᒍᒪᑦᓱᒋᑦ, ᑭᓯᐊᓂ ᐅᖃᕐᒥᔪᖅ ᓲᓪᓗᐊᑎᑕᐅᖕᖏᓂᖅ ᓇᒧᖕᖓᕆᐊᓪᓚᕕᖃᕐᓇᑑᔭᖕᖏᒍᓐᓇᕆᐊᖓ.

“ᓴᔪᑦᓴᒪᕆᒍᓐᓇᑐᑎᑦ ᐊᓪᓛᑦ ᑲᒥᐊᓗᑉᐲᑦ ᐃᓗᐊᓂ,’’ ᐅᖃᕐᓱᓂ, ᐃᔪᕐᓱᓂᓗ, ‘’ ᐱᓗᐊᕐᑐᒥᒃ ᐅᖄᕕᖃᑐᐊᕈᕕᑦ ᓄᓇᓕᕐᔪᐊᑉ ᐊᖓᔪᕐᖄᒪᕆᖓᓂᒃ.

ᑕᒪᓐᓇ ᐱᓇᓱᓐᓂᖓ ᐊᕐᖁᑎᒋᑦᓱᒍ, ᓇᕝᕚᓯᒪᔪᖅ ᑲᔪᓯᔪᒥᒃ ᐱᑦᔪᑎᒥᒃ: ᐱᔭᖃᕐᓂᐊᕈᕕᑦ ᑐᑭᓯᒪᓂᕐᒥᒃ, ᓯᕗᓪᓕᒥ ᐃᓕᓐᓂᐊᖄᕆᐊᖃᕐᑐᑎᑦ. ᐊᒥᓱᓄᑦ ᑲᑎᖃᑦᑕᓯᒪᓕᕐᑕᖏᓐᓄᑦ, ᐱᔭᑦᓴᖓ ᑎᑭᐅᑎᓯᒪᔪᖅ ᐃᓄᑐᐃᓐᓀᑦ ᓯᕗᓪᓕᐹᒥ ᑕᒐᐅᒍᑎᖏᓐᓄᑦ.

“ᐃᓄᐃᑦ ᖃᐅᔨᒪᖕᖏᑐᓪᓘᓃᑦ ᐃᓄᑐᐃᓐᓇᑕᖃᕆᐊᖓ ᐊᓪᓛᑦ ᐃᓚᒋᔭᐅᒋᐊᑦᑕ ᓄᓇᓯᒪᔪᑐᖃᕐᓄᑦ ᑲᓇᑕᒥ. ᐊᒥᓱᒐᓴᑦᔪᐊᑦ ᐃᓄᐃᑦ ᖃᐅᔨᒪᖕᖏᑐᓪᓘᓃᑦ ᐱᑕᖃᕆᐊᑦᑕ. ᐃᓕᓐᓂᐊᓂᖅ ᐱᓪᓗᒍ ᐱᑐᑦᓯᒪᓂᖃᖕᖏᓚᕆᑦᑐᖅ. ᐃᓕᓐᓂᐊᓂᐅᑉ ᐊᑐᕐᑕᐅᒍᓯᖏᓐᓄᑦ ᐃᓚᒋᔭᐅᖕᖏᑐᒍᓪᓘᓃᑦ.’’

ᐊᒥᓱᑦ ᒥᐊᔨᐅᑉ ᐱᓇᓱᑦᑕᖏᑦ ᐊᑯᓂᕆᓂᐊᕐᑐᑦ ᐊᕐᕌᒍᒐᓴᓐᓂ ᐱᔭᕆᒐᓱᐊᕐᓗᒋᑦ, ᐱᒐᓱᐊᕐᕕᒋᓗᒋᑦ ᐊᒥᓱᑦ ᑲᕙᒣᑦ. ᑭᓯᐊᓂ ᑕᒪᓐᓇ ᓱᖁᑎᒋᒍᓐᓀᑕᖓᓘᓐᓃᑦ.

“ᐱᒍᓐᓇᓯᒍᓐᓇᑕᕗᑦ ᐊᕐᕌᒍᓂ 50ᓂ. ... ᑌᑦᓱᒪᓂᐅᓕᕐᐸᑦ ᐱᑕᖃᓚᖕᖏᓂᑯᓐᓄᑦ, ᐅᕙᖓᓘᓐᓃᑦ, ᑐᑭᖃᑦᔭᖏᑦᑐᖅ ᐱᒍᓐᓇᓛᖕᖏᑐᒥᒃ. ᑭᓯᐊᓂ ᓴᐱᓕᑐᐃᓐᓇᕈᕕᑦ ᐱᔭᕆᒐᔭᕐᑕᕕᓂᕐᓂᒃ ᓱᓇᐅᑉᐸᑦ, ᓱᓇᐅᕚ ᑕᒐ ᐱᑦᔪᑎᖓ?”

ᓴᐳᒻᒥᔨᑦᓴᑖᕆᐊᒥᒃ ᐃᓄᖁᑎᒥᓄᑦ, ᒥᐊᔨ ᐅᖃᕐᑐᖅ,ᐱᒍᓐᓇᓇᑦᓯᐊᓲᖅ. ᐅᑦᑑᑎᒋᓗᒍ, ᐃᖃᓗᓐᓂ ᓄᓇᕗᒻᒥ, ᐅᖃᕐᑐᖅ ᓱᒋᐊᓪᓚᕕᖃᖕᖏᑑᔮᕐᓂᒥᒃ ᐃᑉᐱᓂᐊᕐᓂᖏᑦ ᐅᕕᒃᑫᑦ ᐃᓄᐃᑦ ᐊᑦᑐᐊᔭᐅᓐᓇᓚᕆᑦᑐᖅ. ᐃᓕᓐᓂᐊᑏᑦ ᐳᕐᑐᓂᖃᕐᓱᑎᒃ ᖁᓕᓂᒃ 10ᓂᒃ ᖃᐅᔨᕙᓪᓕᐊᓕᓚᐅᕐᓯᒪᔪᑦ ᐊᑐᐊᕐᓯᒍᓐᓇᓂᖏᑦ ᖃᓂᑦᓴᐅᑎᖕᖏᒋᐊᖏᓐᓂᒃ ᑲᓇᑕᒥᐅᖑᒻᒥᓱᑎᒃ ᐃᓕᓐᓂᐊᑎᐅᖃᑎᖏᓐᓄᑦ. ᐃᓕᓐᓂᐊᕖᑦ ᐳᕐᑐᓂᕐᐹᖓᑦ ᐊᓪᓛᑦ ᐱᒐᑦᓴᐅᒍᓐᓀᕙᓪᓕᐊᓱᓂ ᐊᒻᒪᓗ ᑕᒪᓐᓇ ᓇᒻᒪᒋᓪᓗᑐᕆᐊᖓ ᐅᖃᕐᓱᑎᒃ.’’

ᑕᒪᓐᓇ ᐅᐊᕈᑎᒌᑦᓯᔪᖅ ᐃᓕᓐᓂᐊᕈᑎᑦᓴᖃᑦᓯᐊᖏᓐᓂᒥᒃ ᐊᒻᒪᓗ ᐃᓕᓐᓂᐊᕕᒻᒦᖃᔭᑦᓯᐊᖏᓐᓂᒥᒃ. ᒥᐊᔨᒧᑦ ᑕᒪᓐᓇ, ᐃᓱᐃᓪᓕᐅᕈᑎᖏᑦ ᑎᑭᑦᑐᑦ ᐊᖏᕐᕋᖓᓄᑦ. ᐃᓄᑐᐃᓐᓇᓄᑦ ᐅᕕᒃᑲᓄᑦ, ᐃᓕᓐᓂᐊᓯᒪᓂᖅ ᐊᑦᔨᐅᖏᑦᑑᒍᑕᐅᖃᑦᑕᓲᖅ ᑖᒃᑯᐊ ᐊᑯᓐᓂᖏᓐᓂ ᓯᕗᓂᑦᓴᖃᑦᓯᐊᓂᐅᑉ ᐊᔪᕐᓴᓂᐅᓪᓗ.

“ᓇᒻᒥᓂᕐᓕ ᕿᑐᕐᖓᖃᕐᒥᔪᖓ ᐊᒻᒪᓗ ᓴᐳᒻᒥᓂᕐᑕᖃᕆᐊᖃᓲᖑᑦᓱᓂ ᑲᔪᖏᕐᓭᓂᕐᒥᓗ ᐱᐊᕋᕐᓂᒃ ᐃᓕᓐᓂᐊᕕᒥᒃ ᑲᔪᓯᒍᓐᓇᑎᑦᓯᓂᐊᕈᓂ. ᑕᑯᓯᒪᓕᕐᑐᖓ ᐊᒥᓱᐋᓗᓐᓂᒃ ᐅᕕᒃᑲᓂᒃ ᓄᕐᖃᑐᐃᓐᓇᓯᒪᔪᓂᒃ ᐃᓕᓐᓂᐊᕕᒻᒥ, ᐃᓚᒋᔭᐅᒻᒥᑎᓪᓗᒋᑦ ᓇᒻᒥᓂᖅ ᐃᓚᒃᑲ. ᓄᐊᑯᓗᒃᑲ ᐊᖕᖓᑲᓗ ᒪᓐᑐᕆᐊᓪᓕᐊᕐᓯᒪᒻᒥᔪᑦ ᐃᓕᓐᓂᐊᕖᑦ ᐳᕐᑐᓂᕐᐹᖏᓐᓄᑦ ᐃᓕᓐᓂᐊᕆᐊᕐᓱᑎᒃ ᑭᓯᐊᓂ ᐅᑎᑐᐃᓐᓇᑐᑦ ᐊᖏᕐᕋᒧᑦ ᓱᓇᐅᕝᕙ ᐃᓕᓐᓂᐊᕖᑦ ᐳᕐᑐᓂᕐᐹᖏᓐᓄᑦ ᐃᓚᖏᐅᑎᕕᖃᕐᖃᔭᖕᖏᓇᒥᒃ. ᖃᐅᔨᒪᓯᒪᔪᖓ ᐱᖕᖑᐊᖑᖕᖏᓚᕆᑦᑐᒥᒃ ᐱᓀᓗᑕᕐᑕᖃᕆᐊᖓ, ᐱᑐᑦᓯᒪᖕᖏᓗᑐᑦᓯᐊᑐᑦ ᑕᒪᑐᒧᖓ. ᑭᓯᐊᓂ ᖃᐅᔨᒐᒃᑯ, ᐃᑎᔪᒋᐊᓪᓚᒧᑦ ᑐᕐᖁᕆᐊᓪᓚᑐᐃᓐᓇᑐᖅ ᐆᒻᒪᑎᒐᓂ.’’

ᒥᐊᔨᒧᑦ, ᐱᑕᓕᒃ ᓈᒻᒪᓈᕐᕕᐅᒋᐊᖃᕐᓂᒥᒃ ᓱᓱᒋᔭᐅᓂᒃᑯᑦ ᐊᒻᒪᓗ ᐃᓱᒪᕐᓱᕈᓐᓇᕆᐊᖃᕐᓂᒥᒃ, ᑕᒪᓐᓇᓗ ᑕᑯᓯᒪᑦᓱᒍ ᑖᒃᑯᓇᓂ ᐱᖓᓱᓂ ᕿᑐᕐᖓᒥᓂᑦ ᓇᕝᕚᓯᒪᑦᓱᑎᒃ ᐱᒍᓐᓇᓯᑦᓱᑎᒃ ᐱᒍᓐᓇᓯᒍᒪᓯᒪᔭᒥᓂᒃ, ᐊᒻᒪᓗ ᓯᐊᒻᒪᓱᓂ ᐃᓚᒌᑦ ᐊᒃᓚᓯᒪᐅᑎᖏᓐᓂ ᐱᒋᐊᓪᓚᕕᖃᕐᑎᑕᐅᖕᖏᑐᐊᕋᒥ ᓵᓚᕐᖃᕆᔨᒋᔭᒧᑦ.

“ᑕᒪᓐᓇ ᐃᓕᓐᓂᒃ ᐅᕙᓐᓂᓘᓐᓃᑦ ᐱᑦᔪᑎᖃᑦᔭᖏᑦᑐᖅ,’’ ᓚᑦᓱᓂ ᒥᐊᔨ. ‘’ ᐱᑦᔪᑎᖃᑐᐃᓐᓇᑐᕐᓕᒪᓐᓇ ᖃᐅᔨᔭᐅᓯᒪᒐᓚᑦᓴᕋᑖᓗᓕᕐᓂᖏᓐᓂᒃ ᑖᒃᑯᐊ ᐃᓄᖁᑎᕗᑦ ᐃᓅᒋᐊᖏᑦ.’’

“ᐃᒻᒥᓂᕐᓱᓱᓂ ᑲᕙᒪᓐᓂᖅ ᐱᒋᐊᓲᖅ ᐊᖏᕐᕋᒥᑦ. ᐊᑎ ᐱᕙᓪᓕᐊᑎᑦᓯᓚᐅᕐᑕ ᐱᐅᔪᒥᒃ, ᐊᑦᑕᓇᖕᖏᑐᓂᒃ ᓄᓇᓕᓐᓂᒃ ᐃᓄᖁᑎᑦᑎᓄᑦ. ... ᐱᑕᖃᑐᐊᕐᒪᑦ ᓄᓇᓕᓪᓚᕆᓐᓂᒃ, ᐊᒻᒪᓗ ᐃᓄᐃᑦ ᐃᓅᕕᒋᓪᓚᕆᑦᓱᒋᑦ ᑖᒃᑯᐊ ᓄᓇᓖᑦ, ᑖᒃᑯᐊᓗ ᐊᖏᕐᕋᕆᑦᓱᒋᑦ ᐊᕐᕌᒍᒐᓵᓗᓐᓂ, ᐊᐱᕆᔭᐅᒋᐊᓪᓚᕕᖃᕐᖃᔭᖕᖏᑐᑦ ᖃᓄᑐᐃᓐᓇᖅ (ᑖᒃᑯᐊ ᑖᕙᓂᒥᐅᔭᐅᑦᓴᒪᖔᑕ).’’

“ᐊᑑᑎᓕᑐᐊᕋᕕᑦ ᐱᔭᕐᓂᑐᒥᒃ, ᖃᓄᐃᓘᓲᖑᕕᑦ? ᐃᓕᑦᓯᒍᑎᒋᓱᕆᕕᐆᒃ? ᐊᑦᑐᑕᐅᒍᑎᒋᓲᕆᕕᐆᒃ?ᐱᒍᓐᓇᓂᑎᓐᓃᒃ ᐱᒋᐊᓪᓚᑎᑦᓯᒐᓱᐊᓯᓲᖑᕕᑦ ᑕᒪᑦᓱᒥᖓ ᐱᔭᕐᓃᑐᒥᒃ ᓵᓚᖃᕋᓱᐊᓯᑦᓱᑎᑦ ᐊᒻᒪᓗ ᐊᓂᒍᕐᑎᓱᒍ? ᐅᕙᓪᓄᓕ, ᑕᒪᓐᓇ ᐱᖕᖑᐊᖑᖕᖏᓚᕆᑦᓱᓂ ᓄᐃᓯᒪᔪᖅ ᐱᑦᔪᑎ ᓇᓗᓀᕐᓯᒍᑎᐅᑦᓱᓂ ᐱᑦᔪᑎᐅᔪᓂᒃ ᓱᕐᕋᑕᐅᒪᐅᑎᑦᑎᓂᒃ ᐃᓅᑦᓱᑕ. ᓱᓇᐅᕚᑦ ᑖᒃᑯᐊ ᑐᖕᖓᕕᑦᑎᓄᑦ ᑕᒻᒪᓯᒪᒍᑕᐅᔪᑦ? ᓱᓇᐅᕚᑦ ᐊᓯᑦᔨᕈᓐᓇᓇᕐᑐᑦ?”

“ᓲᓱᒋᐅᑎᑦᓯᐊᓗᑕ ᐊᑯᕐᖓᑎᓐᓂ. ᖃᓄᐃᑦᔭᖏᑦᑐᖅ ᑭᓇᐅᒐᓗᐊᕈᕕᑦ, ᐃᓄᑐᐃᓐᓇᐅᒍᕕᑦ, ᐋᓪᓚᐅᒍᕕᑦ, ᐋᓪᓚᖓᔫᒍᕕᑦ, ᐅᐃᒍᐃᖑᒍᕕᑦ ᑲᓇᑕᒥᐅᖑᓗᑎᑦ, ᖃᓪᓗᓈᖑᒍᕕᑦ ᑲᓇᑕᒥᐅᖑᓗᑎᑦ, ᐅᕝᕙᓗᓘᓐᓃᑦ ᐱᓯᒪᒍᕕᑦ ᓄᓇᓕᕐᔪᐊᑉ ᐊᓯᐊᓂᑦ. ᓲᓱᒋᐅᑎᓗᑕ, ᐊᑐᓂᐅᑦᑎᓱᑕ ᐱᕐᖁᓯᑦᑎᒍᑦ, ᐊᑐᓂ ᑭᓇᐅᓂᑦᑎᒍᑦ, ᐊᒻᒪᓗ ᐊᑐᑎᒍᓐᓇᓗᒍ ᐊᑦᔨᒌᖕᖏᒍᑎᕗᑦ. ᓄᓇᕐᔪᐊᖅ ᐊᖏᔪᐊᓘᕗᖅ.’’